“سدرہ نے خود کشی کرلی۔۔۔ “

دھک سے دروازہ  کھلا ۔۔   نیلم خالہ   نے  آتے  ہی   ہیبت ناک خبر سنائی۔ امی  چھوٹے  کا سویٹر بن رہی تھیں  انکے ہاتھ وہیں رک  گئے۔ میں اتنی حواس باختہ ہوئی  ٹی وی کا والیم کم کرنے کے بجائے بڑھا دیا۔  کچھ لمحوں کے لیے تو  ہم سب سکتے میں آگئے تھے۔

“کیسے۔۔۔ ؟ کیوں۔۔۔ ؟”

سدرہ آپی  ہنس مکھ اور  ملنسار تھیں۔  اس بات پہ یقین  کرنا ناممکن تھا کہ انھوں نے خود کشی کرلی۔ گلی میں شور برپا  تھا۔ شائد سدرہ کے گھر والے پہنچ گئے تھے۔  امی  نے   چادر   لی اور خالہ کے ساتھ  ان کی طرف نکل   پڑیں۔ میں  دروازے سے باہر جھانکے لگی۔ سدرہ کی والدہ گلی میں  ہی گھٹنوں کے بل بیٹھیں چھاتی پیٹ رہی تھیں ان کی دردناک دھاڑیں اور بین جگر چھلنی کررہے تھے۔ میری تو  سانسیں بھاری  ہونے لگیں۔  دروازہ بند کرکے میں   برآمدے  میں دبک کے بیٹھ  گئی۔

دو سال ہی ہوئے تھے شادی کو انھوں نے تو   سسرال تو کیا محلے داروں کے دلوں میں  بھی گھر بنا لیا تھا۔     آئے دن سدرہ کے گھر سے کبھی کھیر آرہی  ہے تو کبھی بریانی۔   پڑوس میں پڑھی لکھی بہو آجائے تو محلے کی  عورتیں  کا سب  سے پہلا مطالبہ ہی  یہی ہوتا ہے کہ میرے  بچے کو فری  میں ٹیوشن پڑھا دے۔ انھوں نے اس کے لیے بھی کبھی کسی کو منع نہیں کیا ۔

“سدرہ نے خودکشی کیوں کی ہوگی۔۔  ایسی ہنس مکھ  جوان لڑکی کیوں زندگی قربان کرے گی۔۔؟ ”  

اس سوال کا جواب  کسی کے پاس نہیں تھا ۔   دن  ہفتوں میں بدلنے لگے۔ سدرہ  کی موت سے متعلق ہر شخص کا اپنا ہی نظریہ تھا۔ کسی   کی سوچ تھی کہ قتل  کا کیس ہے اور کوئی ساس سسر اور خاوند کے رویے کے بارے میں نئی کہانی گھڑ  کے سنا دیتا۔    لیکن گزرتے وقت کے ساتھ مجھے اس بات کا یقین ہوچکا تھا کہ سدرہ نے  خود کشی ہی  کی  ہے۔ کیوں کہ میں نے اپنے کانوں سے کچھ ایسا سنا تھا جو شائد کسی اور نہ  سنا ہو۔

ہسٹری  کے نوٹس بنانے میں مجھے ان کی مدد چاہیے تھی شام میں جب میں ان کے ہاں   گئی تو   انکی ساس نے بتا یا  وہ اپنے کمرے میں ہیں۔ میں  دروازے تک پہنچی تو اندر سے رضا بھائی کی آواز آرہی تھی۔۔ میں  واپس مڑنے ہی لگی تھی  تو احساس ہوا شائد دونوں میاں بیوی کے درمیان کسی بات پہ بحث ہورہی ہے۔۔ آس پاس کوئی موجود نہیں تھا  روایتی خصلت کی بدولت  میں دروازے سے کان لگا کے سننے لگی۔

“میں جاب کروں گی تو اس   گھر کا  ہی بھلا ہوگا۔۔  ابا جی سے بات کیوں نہیں کرتے۔۔”

“وہ نہیں مانیں گے۔۔ کیسے سمجھاوں تمہیں۔۔ سدرہ تمہارے اور میرے گھر کے ماحول میں زمین آسمان کے فرق  ہے۔ ۔”

“ٹھیک ہے اگر  تم  یہی چاہتے ہو تو   ۔۔  لیکن یاد رکھنا میں  ایسے ہی گھٹ گھٹ کے   خود کشی کرلوں گی۔۔ اور اسکے ذمہ دار تم ہوگے۔۔ “

“سدرہ تم پاگل ہو گئی ہو۔۔ ہر روز تم خود کشی کرنے دھمکی   دیتی رہیتی ہو۔۔ “

“یہ دھمکی سچ بھی ہوسکتی ہے۔۔ “

میں اتنا ہی سن پائی ۔  اس سے پہلے وہاں کوئی آتا میں    واپس  چلی  گئی ۔

اس وقت مجھے یہ میاں بیوی کے درمیان ہونے والی روزمرہ  کی نوک جھونک لگی۔ جسے  میں نے بالکل سنجیدہ نہیں لیا۔ لیکن اب لگتا ہے شائد سنجیدہ لینا چاہیے تھا۔ ایک خلش سی  ہے دل میں    کہ شاید  میں  ان سے ایک بار بات کرلیتی انھیں سمجھا لیتی۔

سدرہ کی خود کشی کرنے وجہ  کسی اور کے لیے بہت معمولی سی کیوں نہ ہو لیکن   اس نے اس خواہش کو  دماغ پہ اس  حد تک سوار کرلیا تھا کہ زندگی اسکے سامنے چھوٹی پڑ گئی۔   کوئی انسان چاہے جتنا سمجھدار کیوں نہ ہو لیکن جب وہ چیزوں کے بیچ توازن کرنے میں ناکام ہونے لگے تو یہی وہ وقت ہوتا ہے  جب آس پاس کے لوگوں اسکی مدد کے لیے آگے بڑھنا چاہیے۔

ایک ریسرچ کے مطابق جب لوگ بار  بار خوش کشی کرنے کی  بات کرتے ہیں تو چاہے وہ یہ بات  صرف دھمکی دینے  کی غرض سے  ہی کیوں نہ  کر رہے ہوں لیکن اس  چیز کے چانسز  بڑھ جاتے ہیں کہ  شائد کسی موڑ پہ  وہ یہ قدم اٹھا لیں گے۔ اس کے پیچھے  ایک ہی وجہ کار فرما ہوتی ہے کہ   جب ہم کسی  حساس چیز کے بارے میں بار بار بات کرتے ہیں تو  دماغ اس   چیز کو نارمل لینے لگتا ہے اور انسان  وہ کرجاتا ہے جس  کا کوئی اور تصور بھی نہیں  کرسکتا۔  

اس لیے ضروری ہے کہ ہم اپنے اردگرد  کسی  شخص کو  ایسے کسی تناو میں دیکھیں تو اس کی مدد کریں۔ اور مدد کا طریقہ صرف ایک ہے وہ  ہے انھیں اس بات کا ااحساس دلانا  کہ زندگی سے بڑھ کے  کچھ بھی نہیں ہے اور کوئی مسئلہ ایسا نہیں ہے جس   کا حل نہ ہو۔

اپنی اور اپنے  چاہنے والوں کی زندگی  کے بے مول ہونے سے بچائیں۔

تحریر: زویا حسن

دوستوں سے   شئیر کریں

چائنہ میں ایک  اٹھارہ سالہ جوان لڑکی کو  ہسپتال  لایا گیا  ۔  جس میں ایک  دماغی بیماری کی تشخیص ہوئی جسے  “لؤو برین” کا نام دیا گیا۔ دراصل وہ لڑکی اپنے بوائے  فرینڈ پہ اتنی منحصر ہوچکی تھی کہ اس سے بات کیے بنا وہ رہ نہیں سکتی تھی۔ کئی بار جب  وہ اس سے بات نہیں کرپاتا تو وہ گھر کی چیزیں توڑنا شروع کردیتی اور زور زور سے چلاتی۔  جب اس نے ایک دن میں  قریب سو   دفعہ کال کی اور بوائے فرینڈ نے  کال کا   جواب نہیں دیا تو اس نے بالکونی سے کود کر خود کشی کرنے  کی دھمکی دی۔ بوائے فرینڈ نے ڈر کر پولیس رپورٹ کردی اور اسکی      ایسی حالات دیکھ  کر   فوری طور پر ہسپتال منتقل کیا گیا۔

آپ کے ارد گرد بھی ایسے بہت سے کیسز موجود ہوں گے۔  ہم ایسے لوگوں کا مذاق اڑا کے  ان کے بارے میں غلط رائے تو قائم کرلیتے ہیں لیکن ہم یہ نہیں سوچتے کہ وہ    کس  دماغی تناؤ سے گزر رہے ہیں۔  دوست بھی زیادہ سے زیادہ تسلی دیتے یا سمجھاتے ہیں یا پھر اسے اسکے حال پہ چھوڑ دیا جاتا ہے۔     اس بیماری    علاج تو ابھی اس  طرح سے دریافت نہیں ہوا لیکن   ہم اپنے برتاؤ سے ایسے انسان کو اس دلدل سے بچا سکتے ہیں۔

 تحقیق یہ بھی کہتی ہے کہ  ایسے لوگوں کا ماضی   تاریک ہوتا ہے ، انھیں ہمیشہ نظرانداز کیا  گیا ہوتا اور خاص طور پر والدین سے   حقیقی پیار  نہ ملنا بھی ایک بہت بڑی وجہ  ہوسکتی ہے۔  جوانی میں پہنچ کر   جب انھیں  کوئی پیار کرنے والا شخص مل جاتا ہے تو وہ   جذباتی  لحاظ  سے  اس سے  اتنے جڑ جاتے ہیں کہ انھیں وہ انسان کم اور ذاتی جاگیر زیادہ لگنے لگتا ہے۔ اور یہیں سے  تناؤ  پیدا ہونا شروع ہوتا ہے۔  دنیا میں شائد ہی کوئی  ایسا شخص  ہوگا جو کسی  اور کے اشاروں  پہ جینا چاہے گا۔ کچھ لوگ تو   چھوڑ کے چلے جاتے ہیں اور کچھ ا س انسان کی ایسی دماغی حالت کا ناجائز فائدہ  اٹھاتے ہیں۔ اور  انھیں  ایسے کاموں پہ مجبور کردیا جاتا ہے جسے کرنے کا انھوں نے کبھی سوچا بھی نہیں ہوتا۔

  صحیح معنوں میں   صرف گھر والے اور قریبی دوست ہی ایسے شخص کو سنبھال سکتے ہیں اور اسے اس دلدل سے نکال سکتے ہیں۔  آپکی ذرا سی  توجہ کسی کی زندگی بدل سکتی ہے۔ انھیں  نظر انداز نہ کریں۔

آپکی کیا رائے ہے؟

تحریر: زویا حسن

ایک سیشن کے دوران ماہر نفسیات نے ہاتھ میں پانی کا گلاس اٹھایا اور سامنے بیٹھے لوگوں سے مخاطب ہوا۔  عمومی طور پر اس طرح کی صورت حال میں یہ سوال پوچھا جاتا  ہے بتائیں گلاس آدھا خالی ہے یا آدھا بھرا ہوا ہے۔ لیکن  غیر متوقع طور پر  ماہر نفسیات کا سوال تھا

“بتائیں اس گلاس کا وزن کتنا ہوگا؟”

سب نے اندازے کی بنیاد پر اس گلاس کا وزن بتایا۔ کسی نے کہا دو سو گرام تو کسی نے کہا ڈھائی سو گرام۔ لیکن ماہر نفسیا ت نے  ایک انتہائی اہم نکتہ اٹھایا۔

“اس سے فرق نہیں پڑتا کہ اس گلاس کا  حقیقی وزن کتنا ہے۔ فرق اس سے پڑتا ہے کہ اسے میں کتنی دیر تک ہاتھ  میں اٹھائے رکھ سکتا ہوں۔   اگر میں اسے بس ایک منٹ ہی اٹھائے رکھوں تو اس سے مجھ کچھ محسوس نہیں ہوگا۔ لیکن اگر میں اسے  ایک گھنٹہ اس حالت میں اٹھائے  رکھوں تو  میرا بازو درد کرنے لگے گا۔  ا سی طرح پورا دن   اٹھا ئے رکھنے سے مجھے شدید تکلیف  ہوگی اور عین ممکن ہے میرا  بازو مفلوج ہوجائے۔ 

ماہر نفسیات  کی بات بہت گہری تھی۔ کئی بار ہم  انتہائی چھوٹی چیزوں  کو اپنے دماغ پہ اتنا سوار کرلیتے ہیں   اور کئی کئی دنوں  تک بلاجواز انھی کے بارے میں سوچتے  رہیتے ہیں۔ خواہ  وہ کسی شخص کے بارے میں  منفی سوچ ہو یا پھر انتہائی غیر اہم مسئلہ جس کے بارے میں تھوڑی دیر سوچنے سے تو شائد کوئی فرق نہ پڑے۔۔ لیکن  پہروں بیٹھ کے اسی بارے میں سوچنا دماغ کو مفلوج کردیتا ہے۔   اسی لیے اپنی سوچ میں  توازن لا نا انتہائی ضروری ہے۔

آپ کیا سوچتے ہیں اس بارے میں۔۔۔؟

تحریر: زویا حسن

آج جب خالہ سے میں نے انکی چھوٹی  بیٹی کے بارے میں پوچھا  کہ شادی کے بعد کیسی زندگی گزر رہی تو جواباً انھوں نے  رونا شروع کر دیا

“کیا  بتاؤں۔۔ میری بچی تو انگاروں پہ زندگی گزار رہی ہے۔۔ “

“خالہ جب آپکو پتا تھا۔۔ وہ خاتون ایسی ہیں تو  ایسے گھر میں شادی کیوں کردی۔۔ “

میں نے حیران ہو کے پوچھا

“کیا کرتی بیٹا۔۔ کہاں ملتے ہیں اچھے رشتے۔۔۔    لڑکا اچھا لگا تھا۔۔ سوچا  زندگی اچھی گزر جائے گی۔۔ لیکن سسرالیوں نے اسے ایک دن بھی سکون کا سانس نہیں لینے دیا۔۔۔  میں تو بس اپنی بچی کو یہی تسلی دیتی ہوں کہ۔۔ صبر کرو۔۔  تمہاری ساس کی بھی ایک بیٹی ہے۔۔  جو ظلم وہ تم پہ کررہی ہے۔۔ اسکی بیٹی “کے ساتھ اس  سے بھی برا ہوگا

مجھے یہ جان کے حیرت  ہوتی ہے  کہ    شادی کے بعد جن لڑکیوں  کو  سسرال اور خاص طور پر ساس سے    وہ مقام اور عزت نہیں ملتی جس کی وہ حقدار ہوتیں ہیں  اور وہ اپنے حق کے لیے لڑ نہیں سکتیں تو ان کی مائیں   ایسی ہی تسلیاں کیوں دیتی ہیں۔۔ ؟

آپ ہی بتائیے۔۔۔  یہ کیسے مکافات عمل کی امید ہے جس کا   اثر اس انسان پہ پڑے جو شائد اس گناہ  کا حصہ دار بھی نہ ہو۔ جیسے   ساس کی بیٹی۔۔۔ فرض کریں  ساس کی بیٹی کے ساتھ وہ سب  ہو بھی جائے جس کی امید آپ کررہے ہیں۔ تو اس  سے آپکی زندگی پہ کیا فرق پڑے گا۔۔ ؟ 

یا پھر یہ غلط فہمی ہے کہ ساس کو احساس ہوجائے  گا کہ میں نے کسی کی بیٹی کے ساتھ برا کیا  اس لیے میری بیٹی کے ساتھ برا ہورہا ہے۔     ایسا   قصے کہانیوں یا ڈراموں میں تو ہوسکتا ہے لیکن حقیقی زندگی میں یہ  تقریباً ناممکن ہے۔ کم از کم میں نے اپنی زندگی میں ایسا کوئی کیس نہیں دیکھا۔   لوگ مرتے دم دے تک اس بھرم میں رہتے ہیں کہ زندگی میں انھوں نے جو کچھ کیا وہ ٹھیک کیا۔ عین ممکن ہے کہ اس بات کا احساس ہو جائے کہ کچھ غلطیاں ہوئی ہیں۔ لیکن اسکا اقرا ر کبھی کوئی انسان نہیں کرتا۔

بجائے اسکے کہ ہم  اپنی بیٹیوں کو زمانے سے لڑنا سکھائیں۔ حالات کا مقابلہ کرنا اور ہر مسئلے کا حل سمجھائیں۔ ہم اسے ایسی  تاریک خیالی دنیا میں دھکیل دیتے ہیں  کہ  بس وہ کسی اور کے  ساتھ برا ہونے کا انتظار کرے۔ 

یہ تو یوں ہے کہ کسی اور میں انسانیت کھوجتے کھوجتے  اپنی  ہی انسانیت گنوا دیں۔

آپکا کیا  کہتے ہیں اس بارے میں۔۔ ؟

عقلمندی اسی میں ہے کہ “حسین موڑ دے کے چھوڑ دیتے ہیں”
 “وہ کاغذ جس پہ مل کے ‘ یقین ‘ لکھا تھا اسکی ایک کشتی بنا کے، پھولوں کی چند پتیاں اس میں سوار کرتے ہیں اور پھر بہا دیتے ہیں کسی ندی میں” 
ہر بار میری یہی رائے ہوتی اور جواب آتا 
“جب چھوڑنا ہی ہے تو حسین موڑ دے کے کیا چھوڑنا، ایک کاری ضرب لگاتے ہیں پھر دیکھتے  ہیں کس کی کرچیاں زیادہ بکھرتی ہیں” 
 وہ اس انتظار میں رہا کہ میں اسکی بات مان لوں اور میں اس بات پہ اڑی تھی کہ سوچ میری ٹھیک ہے۔ پھر جب وہ کاغذ کھول کے دیکھا تو وہ کورا ہی نکلا۔ ہم دونوں کی سوالیہ نظریں ایک دوسرے  کی طرف اٹھیں ” کہاں گیا وہ یقین جو اس کاغذ پہ لکھا تھا؟” جواب میں آنسو کے نشان جو اس کاغذ پہ خشک ہو چکے تھے بولے کہ کس یقین کو ڈھونڈ رہے ہو؟ اس نے تو اپنے ہی آنسوؤں سے خود کو مٹادیا۔ 
 جب سب ختم ہوا۔ جاتے جاتے ہم دونوں نے یہ فیصلہ کیا کہ ایکدوسرے کو خالی ہاتھ نہیں جانے دیں گے۔ 
“اس نے میرے ہاتھ میں ‘دھوکہ’ تھمایا اور میں بدلے میں ‘خاموشی’ اسکے حوالے کرکے چلی آئی”

فرض کریں کسی دفتر کا ویٹنگ روم ہے جہاں آپ ایک صوفے پہ بیٹھے اپنے موبائل فون میں مگن ہوں، یا پھر ادھر ادھر کی چیزوں کا جائزہ لے رہے ہوں۔ اور دماغ میں چلتی باتیں چہرے کے تاثرات سے واضح ہورہی ہوں اور آپکو ایک دم سے احساس ہو کہ سامنے والی دیوار میں ایک کیمرہ نصب ہے، پھر کیا ہوگا؟؟
“ایک دم سے چونکنا، لباس درست کرنا اور بہت ہی باادب اور معتبر انداز میں سیدھے ہوکے بیٹھ جانا “
یہ ہوتا ہے کیمرے کے اس چھوٹے سے لنز کا کمال۔ دراصل کمال  کیمرے کا نہیں اس فطرت کا ہے جو ہر انسان کے اندر موجود ہے۔ جب انسان کو یہ محسوس ہو کہ اسے دیکھا جا رہا تو وہ بہت محتاط ہوجاتا ہے۔ یہی وجہ ہے ، جب آپ سٹیج پہ کھڑے کافی لوگوں سے مخاطب ہوں تو بات چیت اور انداز میں ایک واضح تبدیلی ہوتی ہے۔ ایسا اس لیے ہوتا ہے کہ انسان کوشش کرتا ہے کہ وہ دیکھنے والوں کے سامنےجتنا اچھا خود کو دکھا سکتا ہے اسے دیکھانا چاہیے۔
پر میں ایک اور چیز سوچ رہی تھی کہ کوئی ایسا انسان جو اس بات پہ بھی یقین رکھتا ہو کہ اس”  ذات پاک “کی نظر ہر وقت اس پہ ہے پھر بھی وہ غلطیاں کرے تو اسکا ایک ہی مطلب ہو سکتا ہے ۔ یا تو اسکی فطرت بدل گئی ہے یا پھر اسے احساس ہی نہیں کہ اسکے دماغ میں پنپنے والے فتور سے لے کر اسکے ہر اچھے اور برے عمل کو ایسے دیکھا جارہا جیسا وہ خود بھی خود نہیں دیکھ سکتا۔ 
” جہاں ہم عام نظر کا سامنا کرنے کے لیے  خود میں ایک اچھی تبدیلی لا سکتے ہیں تو اس نظر کا سامنا کرنے کے لیے خود کو کیوں نہیں بدل سکتے؟

آخری دیدار کے لیے جب اس خاموش جسم کے پاس میں پہنچی اور چہرے سے سفید کپڑا ہٹایا تو روح اور جسم کے تعلق کی حقیقت میرے سامنے کھلی”
وہ بہت خوبصورت تھی۔ سب لوگ ہی اسکی خوبصورتی کی تعریف کرتے تھے۔  ہلکے سے بناؤ سنگھار سے چار چاند لگ جاتے تھے۔ بڑی بڑی روشن آنکھیں، دودھ جیسی رنگت اور گلابی ہونٹ۔ بہت کم لوگ ایسے ہوتے ہیں جن کی خوبصورتی اس حد تک شفاف ہوتی ہے۔ عمر قریب بیس سال تھی، یونیورسٹی سے واپس آتے گاڑی کے ساتھ ٹکر لگنے سے وہ جانبر نہ ہو پائی۔ گھر بس جسم لوٹا اور روح وہیں کہیں رہ گئی۔ پہلے پہل جب خبر مجھ تک پہنچی تو یقین نہیں آیا۔ میں دوڑتی ہوئی اسکے گھر پہنچی، ہر آنکھ اشک بار تھی ۔ ایک پل کے لیے تو لگا شاید میں ہی مر گئی ہوں۔ حواس پہ قابو پاتے میں اسکی لاش کے پاس پہنچی، کفن ہٹا کے چہرہ دیکھا۔ 
 ” یہ تو وہ تھی ہی نہیں۔ نہ وہ روشن آنکھیں نہ جگمگاتا چہرہ نہ وہ گلابی ہونٹ۔ آنکھیں بے نور تھیں، چہرہ سیاہی مائل اور ہونٹ کالے پڑ گئے تھے۔ میرے دل اور دماغ میں ایک عجیب کشمکس تھی کہ زندگی تو ختم ہوئی سو ہوئی پر حسن تو جسم کی امانت تھا، وہ کہاں کھو گیا؟ ہاں شاید موت ہی اتنی بھیانک چیز کا نام ہےجس کے سامنے حسن بھی ٹک نہیں پایا ہوگا۔ سارا الزام موت پہ ڈالے میں واپس مڑی۔ ایک دم سے میرے اندر کہیں سے آواز آئی
” حسن  کی وابستگی جسم سے نہیں روح سے ہے، خاک تو خاک ہوتی ہے، نہ خوش شکل نہ بد شکل۔ جب روح نکلی تو حسن کہاں ٹھہرتا؟”
مجھے اب سمجھ آیا، میں غلط جگہ وقت گنوا  رہی تھی۔ جس جسم کے سنگھار میں میں نے اتنی تگ ودو کی اسکی حقیقت ہی کچھ اور تھی۔ ضرورت روح کو سنوارنے کی تھی اور میں مٹی کا تودہ سنوارنے میں لگی رہی۔ 
 ” شکر اس بات کا ہے کہ وقت رہیتے مجھے سمجھ آگیا

شہر کی بڑی یونیورسٹی میں میرا داخلہ ہوا، میری خوشی کی انتہا نہ تھی، اپنے گاؤں سے میں پہلا لڑکا تھا جو شہر میں جا کے اپنی تعلیم مکمل کرتا۔ اپنے سبھی گاؤں کے دوستوں کو میں نے یہ خوش خبری سنائی۔ اگلے ہی دن میری ماں نے میرا سامان باندھا اور شہر جانے کے لیے مجھے تیار کیا۔ ان دنوں ہمارے گاؤں سے قریبی قصبے تک تانگے کی سواری چلتی تھی پھر وہاں سے شہر کی بس ملتی۔ مجھے شہر کی بس تک بٹھانے کے لیے میرے ابّا جی بھی تانگے پر سوار ہوئے۔ کچے رستے پہ چلتے چلتے تانگہ ہمارے کھیتوں کے پاس سے گزرا۔ ابّا جی ہاتھ کے اشارے سے مجھے بتانے لگے کہ ہمارے کھیت کون کون سے ہیں اور کونسی زمین کس فصل کے لیے موزوں ہے۔ یہ ساری باتیں تو میں پہلے سے ہی جانتا تھا۔ پھر کیوں وہ مجھے یہ سب بتا رہے تھے۔ اس سے پہلے کے میں ان سے پوچھ پاتا، انھوں نے تانگے والے کو تانگہ روکنے کا اشارہ دیا۔ وہ رک گیا۔ ابّاجی نے مجھے نیچے اترنے کا کہا۔ میں اپنا سارا سامان تانگے پہ چھوڑے، نیچے اترا۔ وہ مجھے ساتھ لیے کھیتوں کے بیچ پگڈنڈی پہ چلنے لگے۔ تھوڑی دور چل کے وہ میری طرف مڑے۔ ذرا سا جھک کے تھوڑی سی مٹی اپنی مٹھی میں بھرکے میری طرف ہاتھ بڑھایا اورمٹھی کھول دی۔ 
“بیٹا۔۔۔ ! یہ مٹی تمہاری پہچان ہے، اسے کبھی مت بھولنا، کیوں کہ ایک بار اگر پہچان کھو دی تو  پھر انسان خود کو بھی کھو دیتا ہے” وہ آبدیدہ تھے۔ 
 وقت گزرتا رہا اور شہر جاکے میں نے اپنی ڈگری مکمل کرلی۔ شہر کی بارونق زندگی کا مجھے ایسا چسکا لگا کہ اپنے گاؤں کی زندگی پھیکی لگنے لگی۔ ابّا جی کی خواہش تھی کہ پڑھائی مکمل کرکے میں گاؤں واپس آجاؤں اور یہیں پہ کوئی کاروبار شروع کروں۔ لیکن میرے ارادے کچھ اور ہی تھے۔ 
 کچھ عرصے بعد ابّاجی گزر گئے، میں نے انکی ساری سیکھائی باتیں پسِ پشت ڈالیں اور گاؤں کی ساری زمینیں اور جائیداد بیچ کے شہر رہنے آگیا۔ جب تک باپ کی جائیداد کا پیسہ تھا تب تک تو زندگی پرسکوں تھی پر جب پیسہ ختم ہوا تو زندگی نے اپنے اصل رنگ دکھانا شروع کیے۔ پھر میں نے دن رات محنت مشقت کی اور زندگی کی گاڑی کو جیسے کیسے راستے پہ لے آیا۔ لیکن گزرتے وقت کے ساتھ میرے باپ کی وہ بات مجھے شدت سے ستانے لگی کہ اگر اپنی پہچان بھولو گے تو خود بھی کہیں کھو جاؤ گے۔ اگر میں اپنے باپ کی بات مان لیتا تو شائد گاؤں میں بھی میں بہت اچھی زندگی گزار سکتا تھا ۔ اپنی تعلیم سے اپنے لوگوں کی زندگی سنوار سکتا تھا۔ وہ گاؤں اور وہ لوگ میرے تھے جنھیں میں چھوڑ کے آیا۔پر میں کسی کا نہیں تھا۔ شائد اپنا بھی نہیں۔
ایک عرصے بعد مجھے وقت  پھر اسی مقام پہ لے کے آیا جہاں میں کھیتوں کے بیچ پگڈنڈی میں کھڑا تھا اور اس بار میرے سامنے میرا باپ نہیں بیٹا تھا۔ جسے اس ملک سے مسئلہ تھا۔ جو پاکستان کو چھوڑ کے باہر کسی اور ملک میں جانا چاہتا تھا۔ اسے لگ رہا تھا کہ یہاں پہ زندگی گزارنا بہت مشکل ہے۔ اب میں اسے کیسے سمجھاؤں کہ ہماری پہچان اس ملک سے ہے۔ ہم ہی اسے چھوڑ دیں گے تو کون آکے اسے سنوارے گا۔۔۔۔۔ !
ہم ہمیشہ یہ تو کہتے ہیں کہ پاکستان ہمارا ہے۔ پر اب سوال یہ ہے کہ کیا ہم بھی پاکستان کے ہیں؟؟
 میری طرف سے اہلِ وطن کو جشنِ آزادی مبارک ہو۔ اپنی رائے ضرور دیجیے گا

ضرورت ایجاد کی ماں ہے” بہت مشہور کہاوت ہے۔ ہر ایجاد کے پیچھے ایک سوچ ہوتی ہے۔ اور ہر سوچ کے پیچھے ایک لگن کام کرتی ہے۔ جب لگن ہو تو قدرت راستے خود بخود پیدا کردیتی ہے۔ کوئی سوچ دماغ میں کب آئے گی ، کیسے آئے گی یہ تو کوئی نہیں جانتا پر ہاں وہ سوچ آتی ضرور ہے۔ بس ضرورت اس بات کی ہوتی ہے کہ اس سوچ کا صحیح استعمال کب اور کیسے کیا جائے۔ 
 “جان شیپرڈ ” جنھوں نے اے ٹی ایم مشین ایجاد کی۔ اس ایجاد کی سوچ ان کے دماغ میں پہلی بار تب آئی جب وہ غسل خانے میں نہا رہے تھے۔ اور اس ایجاد نے دنیا ہی بدل دی۔ اگر” اے ٹی ایم کوڈ “کی بات کی جائے تو پہلے پہل انھوں نے چھ ہندسوں پر مشتمل کوڈ رکھنے کا فیصلہ کیاکیوں کہ وہ چھ ہندسے آسانی سے یاد رکھ سکتے تھے۔ پر جب اپنی بیوی سے اس انھوں نے اس بارے میں بات کی تو انھوں نے “چار ہندسوں ” پر مشتمل کوڈ کی تجویز دی۔ کیوں کہ وہ چار ہندسے ہی آسانی سے یاد رکھ سکتی تھیں۔ اور تب 1973 میں پہلی بار اس مشین کا استعمال عمل میں آیا۔ اس سال امریکہ میں دو ہزار اے ٹی ایم مشینیں فروخت ہوئیں اور لگائی بھی گئیں۔ 
 ایسی ہی چھوٹی سے سوچ جو کبھی بھی کہیں بھی آسکتی ہےوہ دنیا کو بدل کے رکھ دیتی ہے۔ سوچ کبھی چھوٹا ، بڑا یا خاص اور عام نہیں دیکھتی ، بس دیکھتی ہے ایک ذرخیز دماغ اور لگن۔ 
اگر آپکے دماغ میں بھی کبھی ایسی کوئی  انوکھی سوچ آئے تو اسے نظرانداز مت کیجیے گا۔ ہوسکتا ہےیہ قدرت کی طرف سے کوئی اشارہ ہو

بادشاہ کے محل میں صفائی کرتے جب ایک بھنگی کی نظر ملکہ پہ پڑی تو وہ پہلی نظر میں اس پہ فدا ہو گیا۔ لیکن اپنی حیثیت اور ملکہ کی حیثیت میں فرق دیکھا تو سر جھکائے وہاں سے چلا گیا۔ پر دل تھا جو ایک ملاقات کی حسرت میں تڑپتا رہا۔ عشق کی بیماری نے جسمانی بیماری کا روپ لیا اور وہ بستر پہ پڑ گیا۔ بھنگی کی بیوی بھی اس ساری حالت سے واقف تھی۔ بھنگی کی خراب حالت کی بنا پر اسکی بیوی اسکی جگہ کام پہ لگ گئی۔ 
کئی دن تک جب بھنگی ملکہ کو وہاں نظر نہ آیا تو اس نے اسکی بیوی سے دریافت کیا، بھنگی کی بیوی یہ سوچ کر گھبرا گئی کہ ملکہ کو اصل بات بتا دی تو نا جانے کیا حال ہو ہمارا۔ لیکن ملکہ نے اسکی گھبراہٹ جانچ کر اسے اعتماد میں لیا اور حقیقت پوچھی۔ بھنگی کی بیوی نے وہ ساری صورت حال ملکہ کے گوش گزار کر دی۔ تب ملکہ نے اسے کہا کہ اس سے ملاقات کا یہی ایک رستہ ہے، تم اپنے شوہر سے جا کے کہہ دو کل وہ شہر سے باہر کسی رستے پہ بیٹھ جائے اور بس اللہ اللہ کرتا رہے، نہ تو کسی سے بات کرے اور نہ ہی کسی کا دیا کوئی تحفہ قبول کرے۔ ایسا کرنے سے جب اسکے چرچے بادشاہ تک پہنچیں گے تو ملاقات کے رستے بھی کھل جائیں گے۔ 
 ملکہ کا پیغام سنتے ہی بھنگی کی جان میں جان آئی اور وہ گداؤں کا بھیس بدل کے ایک رستے پہ جا کے بیٹھ گیا اور اللہ اللہ کا ورد شروع کردیا۔ آنے جانے والے اس متاثر ہوتے اور نظرانے ساتھ لاتے لیکن وہ نہ سر اٹھا کے کسی کو دیکھتا نہ ہی کسی چیز کو ہاتھ لگاتا۔ کرتے کرتے خبر بادشاہ تک پہنچی اور اس نے وزیر کو بھیجا کہ دریافت کرو کہ کون ہے وہ اور اسکی سچائی کس حد تک ہے۔ وزیر نے واپس جا کر بادشاہ سے اسکی بہت تعریف کی، بادشاہ فیض پانے کی غرض سے خود چل کر اسکے پاس گیا۔ 
 جب ہر طرف اسکے چرچے ہونے لگے تو ملکہ نے بادشاہ سے اس نیک انسان کی زیارت کی خواہش ظاہر کی۔ بادشاہ نے اجازت دی۔ اسی اثناؑ میں جب بھنگی کو اس بات کا احساس ہو کہ اب تک وہ دل سے نہیں صرف ایک دنیاوی مقصد کے تحت ہی اللہ پاک کے نام کی تسبیح کر رہا تھا۔ وہ جھوٹآ ہے لیکن پھر بھی اللہ کی رحمت اس پر اس قدر ہے کہ لوگ اسکے سامنے جھک رہے ہیں کیا بادشاہ اور کیا عام آدمی سب ہی اسے عزت دے رہے ہیں۔ یہ کرامات تو صرف زبان سے وہ پاک نام لینے کی ہیں اگر سچے دل سے اس نام کی تسبیح کی جائے تو اور کتنی رحمتوں کا نزول اس پہ ہوگا۔ جب ملکہ اسکے پاس پہنچی تو اس نے سر اٹھا کے اسکی طرف نہ دیکھا اور وہ روتی ہوئی واپس اپنے محل چلی گئی۔ 
 بے شک اس پاک ذات کا ذکر اپنے آپ میں ایک رحمت ہے